परिहार मिलन मिठाई

वारशाची चव, प्रगतीचा आत्मा

छत्रपती संभाजीनगरच्या हृदयात, परिहार मिलन मिठाई हे नाव घराघरात परिचित आहे - शहराच्या गोड परंपरेचा आणि सणासुदीच्या आनंदाचा एक महत्त्वाचा भाग. प्रीती परिहार यांचे पणजोबा राजस्थानमधून केवळ धैर्य आणि दूरदृष्टी घेऊन आले आणि एक छोट्याशा मिठाईच्या दुकानापासून सुरुवात केली. आज, हे नाव चार शाखांसह आणि १०० हून अधिक कर्मचाऱ्यांसह एक प्रतिष्ठित ब्रँड बनले आहे.

चव आणि परंपरेचा आरंभ

काही दशकांपासून या व्यवसायाची तीन बळकट पायाभूत मूल्ये आहेत: चवीत सातत्य, सांस्कृतिक परंपरा, आणि सतत पसरविलेला आनंद. आता, चौथ्या पिढीतील प्रीती परिहार या वारशाची जपणूक करत असून, नव्या युगाला साजेसं रूप देताना आत्मविश्वासाने पुढे जात आहेत.

ही चव सुरू झाली एका धाडसी निर्णयाने.  प्रीती ताईंच्या पणजोबांनी कोणताही मार्गदर्शक नसताना केवळ कौशल्य, कला आणि इच्छाशक्तीच्या जोरावर मिठाई व्यवसायात पाऊल ठेवलं. पुढे जाऊन कुटुंबाने पाककृती परिष्कृत केल्या, दर्जा टिकवला आणि समाजात विश्वास मिळवला - एक ग्राहक, एक मिठाई करत.

विकासाची दिशा

त्यांची खास पद्धत? सुरुवातीपासून शेवटपर्यंत गुणवत्ता. अनेक जुने कारागीर आजही त्यांच्या स्वयंपाकघरात काम करत आहेत. साहित्य स्थानिक बाजारातून घेतले जाते - सुका माल घाऊक प्रमाणात, तर ताजी सामग्री रोज सकाळी. आणि हळूहळू नवकल्पनाही येत आहेत - गुळाच्या मिठाया, ग्लुटन-मुक्त वस्तू आणि बाजरी/नाचणीच्या चिवड्यांचा समावेश.

त्यांच्या ब्रँडचा लोगो म्हणजे  एक  आई तिच्या बाळाला अन्न भरवत आहे — प्रेम, विश्वास आणि शुद्ध हेतू याचं प्रतीक. “जसं एक आई आपल्या मुलासाठी नेहमी सर्वोत्तम निवडते, तसंच आम्ही आमच्या ग्राहकांसाठीही करतो,” असं प्रीती म्हणतात. हे केवळ घोषवाक्य नाही — तर त्यांच्या संपूर्ण कामकाजाचं मूळ आहे.

कसोटीचे क्षण

प्रत्येक जुन्या व्यवसायासारखंच, परिहार मिलन मिठाई नेही अनेक चढ-उतार पाहिले. मंदीचे काळ, स्पर्धा, आणि सोप्या मार्गांचा मोह - या सर्वांनाच सामोरे  जावे लागले. पण त्यांनी कधीच शॉर्टकट घेतले नाहीत. टीकेला शांतपणे आत्मपरीक्षणाने उत्तर दिलं. बदल केले गेले, पण तडजोड कधी केली नाही.

किंमतीत स्पर्धा नाकारली. स्विगी किंवा झोमॅटो सारख्या डिलिव्हरी ॲप्सवर येणंही टाळलं - दर्जा टिकवण्यासाठी. आणि जाहिरात? फार मोठी नाही, पण प्रभावी - तोंडी प्रचारावर आधारित, आकर्षक घोषणांपेक्षा दूर.

व्यावसायिक तत्त्वज्ञान

प्रीतीताईंचे स्वप्न आहे - परिहार मिलन मिठाईच्या वस्तू भारतभर सुपरमार्केट्समध्ये दिसाव्यात, केवळ चवीसाठी नाही तर त्यांच्या मूल्यांसाठी ओळखल्या जाव्यात. त्या हळूहळू आणि सुस्पष्टतेने तो मार्ग चालत आहेत - पूर्वीच्या पिढ्यांच्या विश्वासाची जपणूक करत.

त्यांचा सल्ला उद्योजकांसाठी खूपच अनुभवाधारित आहे:

·      योग्य वेळेची वाट पाहू नका - ती कधीच येत नाही.

·      कृती करा, मनापासून प्रयत्न करा आणि चालत राहा.

·      प्रत्येक छोटा टप्पा मोठ्या स्वप्नाच्या दिशेने एक पाऊल असतो.